كتب هاني صابر:
شاركت أسما شريف منير، متابعيها عبر السوشيال ميديا منشورا جديدا بعد جدل حلاقة شعرها “زيرو” خلال الأيام الماضية.
ونشرت أسما، المنشور، عبر “ستوري” حسابها على إنستجرام، وجاء فيه: “سيموت نصف إبداعك إن فكرت في رأي الآخرين، تذكر أن لك رواية لا ينظر للأشياء منها سواك”.
ولجأت أسما، لحلاقة شعرها بسبب معاناتها مع “الغدة” بحسب وصفها، حيث نشرت مقطع فيديو وهي تقوم بحلاقة شعرها عبر “ستوري” حسابها على إنستجرام، وعلقت: “بقالي كتير شعري بيقع جامد، وقررت قرار صعب جدا”.
وقالت بالفيديو: “القرار مش سهل خالص.. وحاسة أني أنا ببتدي حاجة جديدة من الأول، وشعري كان بيقع بطوله، لأن أنا عندي الغدة وهي مش متظبطة فكان بيقع بجد على شكل كتل، وحاولت أظبطه لكن معرفتش وكنت حاسة أنه محروق، والشعر هيطول تاني”.
وفي تدوينة ثانية، نشرت أسما شريف منير، فيديو وهي تحلق شعرها، عبر حسابها على إنستجرام، وعلقت: “شعري بقاله فترة بيقع جامد، ده غير إن من كتر العمايل اتحرق، وبقي مش صحي خالص، وقررت أنفذ قرار كان بقالي كتير أوي نفسي أخده.. أبدأ من جديد، وأحرر نفسي، وأفتح صفحة جديدة، حقيقي هو قرار صعب جدا بس حسسني بقوة وتفاؤل”.
وتابعت: “رميت ورايا حاجات كتيرة أوي بمجرد إني شلت شعري، قلبي كان بيدق جدا وبعديها حسيت إني مليانا أدرينالين.. خطوة جريئة ومرعبة بس حاسة إني طالعة منها بدرس”.
وأضافت: “عارفة إن فيه ناس كتير هتهاجمني بس أنا فارق معايا احساسي بالراحة اللي أنا حساها دلوقتي.. عادي هيطول تاني بس الإحساس ده مش هحسه غير مرة.. بكره هتشوفوا النتيجة الأخيرة”.
وفي تدوينة ثالثة والتي جاءت بعد ظهورها أمام الجمهور في حفل مهرجان القاهرة للدراما حليقة الشعر، حيث كتبت عبر حسابها على إنستجرام: “طيب أول حاجة شكرًا على كل ردود الفعل، الوحشة والحلوة كلها، ساعات موقف زي ده بتخلي ناس تشوف ناس تانية عاملين ازاي مجرد انهم بيعبروا عن رأيهم، وشكراً لكل الناس اللي كانت خايفة وقلقانة عليا، ممكن بقي أقولكم الحكاية من وجهة نظري ببساطة”.
وقالت: “أولاً الحكاية جت بالصدفة جداً وكان قرار لحظي وانفعالي جدًا ومش ندمانة عليه، تاني حاجة انا مش بعمل كده عشان أطلع ترند بس كنت عارفة هبقى ترند، في فرق كبير بين عايزه وعارفة، على فكرة الترند ده نقمة مش حاجة حلوة خالص بس مش هدخل في الجدل ده دلوقتي”.
وتابعت : “تالت حاجة أنا الحمد لله كويسة ومبسوطة ومش واخدة الخطوة دي بسبب اكتئاب خالص بالعكس دي صفحة جديدة حلوة مليانة تفاؤل وقوة وإرادة وتحدي وجرأة وشجاعة وكل حاجة إيجابية في الكون، أنا فعلًا من فترة كنت بمر بمرحلة صعبة جدًا بس كنت في رحلة بقالي شوية بتعافى منها وبقف على رجلي من الأول وكان آخرها رحلة دهب”.
وأضافت: “فـ تاني بالعكس ده مش اكتئاب دي مرحلة انتقالية مؤمنة إني هحقق فيها حاجات كتير، أخر حاجة الجماعة اللي مكبرين الموضوع ده شعري مش شعرك، حاجة كده بجد أخير أنا عاجبني شكلي جدًا بصراحة، شكله جامد ومديني ثقة في نفسي جدًا، بحبكم أوي بجد”.